SALI BERISHA NË RRAJCË

Muaji shtator startoi në komunën Rrajcë, me një ditë feste të veçantë. I gjithë komuniteti përjetoi ditën mbresëlënëse të 6 shtatorit në Qendër Rrajcë, ku u zhvillua ceremonia e inaugurimit të asfaltimit të rrugës Rrajcë me gjatësi prej 2.85 km që u shërben 8000 banorëve të një zone më të populluar të kësaj komune.

Në këtë ceremonial me ngjyra festive në dekorin e natyrës së gjelbëruar të Rrajcës, morën pjesë; Kryeministri i Shqipërisë z. Sali Berisha, ministri i Financave z. Ridvan Bode dhe ministri i Punëve Publike Transportit dhe Telekomunikacionit z. Sokol Olldashi si dhe një sërë autoritete të tjera shtetërore e vendore.

E veçanta në këtë përurim publik në infrastrukturën rurale, ishte pjesëmarrja e gjerë e banorëve dhe kënaqësia e tyre që iu plotësua realisht dëshira e ëndërruar e 20-vjetëve me radhë. Prandaj, mes emocioneve të bukura të një dite feste këtu në Rrajcë, u shkonte shumë për shtat shprehja: “Dy bjeshkë, dy ngjyra, dy burra!”.

Kryeministri i vendit dhe kryetari i Komunës z. Seladin Bogdani ndajnë mes tyre të njëjtin preokupim dhe shqetësim qytetar, atë të infrastrukturës vendore në rrugë, ujësjellës dhe ndërtesa shkollore në përputhje me standardet dhe modelet ndërtuese të kohës.

Nga komuna janë përgatitur 5 projekte teknike të shoqëruara me preventivat përkatës për objekte të ndryshme investimesh me përfaqësi si ai i Kaptazhimit të ujit në burimin e Tunelit Qafë-Thanë me një vlerë prej 35.599.486 lekë, projekti i ujësjellësit të fshatit Sutaj (Gurët e Zeza) me një vlerë prej 40.000.000 lekë si dhe projektet e rikonstruksionit të shkollës 9-vjeçare Katjel me një vlerë prej 12.946.883 lekë, të shkollës së mesme Kotodesh me një vleftë prej 16.000.000lekë dhe të shkollës CU-Urakë me një vleftë prej 5.600.000 lekë.

Nga Banka Botërore me fondet e saj do të ndërtohet me investime të fuqishme për rehabilitimin e zhvillimin e plotë të Fushës së Domosdovës, kryesisht në kanalizimet, ujitjen në fshatin Rrajcë, Urakë e Kotodesh.  

Mimoza VASKU

Spasse THANASI