AS EMRI DOMOSDOVË E AS HISTORIA  E SAJ

NUK JANË PRONË E ASKUJT

Intervistë me drejtoreshën e gazetës z Mimoza Vasku

Në adresë të gazetës sonë gjatë kësaj periudhe kanë ardhur shumë letra me pyetje, mendime dhe propozime të ndryshme për mbarëvajtjen e punës së gazetës. Me këtë rast gjejmë momentin që dhe publikisht t’i falënderojmë dërguesit për shqetësimet dhe mendimet e tyre. Po i përgjigjemi pyetjeve të një lexuesi nëpërmjet drejtoreshës së gazetës, mbasi një pjesë e pyetjeve i takojnë direkt asaj, si bijë e Domosdovës.

            Gazeta “Domosdova” me ç’shikoj unë, duan apo nuk duan disa, ajo është bërë e njohur, ajo ka dalë tani rrugëve të jetës. Ajo gjendet në duart e lexuesve, nëpër kioska e tezga ku shiten edhe gazetat e tjera. Tani gazeta “Domosdova” ka lexuesit e saj, por më e rëndësishmja, ajo ka njerëzit e pasionuar të letrave që i janë bashkangjitur stafit të gazetës për të nxjerrë në dritë shqetësimet dhe problemet por dhe vrullin dhe talentin e njerëzve punëtorë dhe artistë të kësaj zone. Ju çfarë mund të na thoni më shumë për këtë gjë?

            Qëndrimi dhe puna në Tiranë më njohu me shumë intelektualë e njerëz që janë lindur e rritur në fshatrat e Fushës së Domosdovës, të cilët në pozicionet e tyre shtetërore apo civile kontribuojnë si intelektualë apo si specialistë në mënyrë të suksesshme, ku mund të përmendësh dhjetëra, por unë nuk po i përmend sepse një pjesë e emrave të tyre janë bërë pjesë e gazetës dhe me emra të tjerë nëpërmjet shkrimeve të tyre dhe me intervistat e herëpashershme të stafit tonë do t’i shohim në gazetë. Njohja me ta, si dhe me historinë e Domosdovës më forcuan bindjen se vërtet Domosdova është e madhe, unike e me njerëz të mëdhenj. Në kërkim të asaj se ç’mund të bëja dhe unë për zonën time se si mund t’i shërbeja asaj, më lindi ideja e krijimit të kësaj gazete si një tribunë e zërit të intelektualëve për të ndryshuar diçka në këtë zonë rurale me pasuri të mëdha, që flenë nën tokë dhe mbi tokë. Për këtë ide, pasi u konsultova me shokët dhe miqtë e mi në Tiranë, Prrenjas dhe fshatrat rreth fushës së Domosdovës dhe pasi mora mbështetjen e tyre, e bëra realitet. Pra, gazeta “Domosdova” siç e përmendët dhe ju ka dalë në rrugën e madhe të jetës për të dhënë kontributin e saj modest së bashku me gazetat e tjera, por në mënyrë më të përqendruar e më afër njerëzve, fakteve, historive dhe legjendave që kanë qenë frymëzimi im, pa të cilat nuk mund të isha kjo që jam sot.

            Ky është numri i pestë i gazetës dhe pavarësisht eksperiencës së krijuar nga puna në botën e letrave, ç’ eksperiencë të re keni krijuar në drejtimin e punës për botimin e kësaj gazete?

Qëkur e mora vendimin së bashku me stafin e gazetës për botimin e saj, isha e vendosur për të mos pasur kthim prapa. Isha e vendosur që gazeta “Domosdova” të dilte sipas parashikimit dy herë në muaj duke paguar vetë çdo lloj kostoje, jo vetëm monetare por dhe morale, ku kam parasysh presionet, thashethemet dhe cmirën që na karakterizon kur shohim se dikush bën diçka të mirë, dhe aq më shumë kur këtë e bën një femër. Por duke pasur parasysh se çdo punë e re ka vështirësitë e fillimit nuk u befasova përpara problemeve që më dolën dhe nuk kam frikë dhe as nga problemet që natyrisht do të dalin edhe në të ardhmen. U befasova vetëm nga një fakt dhe vazhdoj të mos e kuptoj shqetësimin e disave për vendosjen e gazetës me emrin “Domosdova”. Nuk e di pse i pengon ky emër i gazetës, apo se unë jam nga Rrajca? Jo, askush nuk  e përvetëson dot emrin e Domosdovës. As emri Domosdovë e as historia e saj nuk janë pronë e askujt dhe askush nuk është i privuar për të vendosur emrin një gazete, reviste apo firme a biznesi të pavendosur më parë nga dikush tjetër. Kjo nuk duhet të pengojë askënd, se ja që isha unë e para që dola publikisht, pavarësisht se dikujt tjetër dhe mund t’i ketë vajtur mëndja për të bërë këtë që bëra unë apo diçka të ngjashme. E rëndësishme nuk është se kush e jetësoi emrin e Domosdovës, por ajo që emri  Domosdovë, do ta jetë i përjetësuar edhe në një gazetë. E rëndësishme është gjithashtu se nga vetë emri është rritur edhe interesimi dhe numri i lexuesve si për të lexuar, ashtu dhe për të shkruar në gjini të ndryshme. Vetë puna e stafit të gazetës, e njerëzve të pasionuar të saj është eksperienca më e vyer për mua ku gjej rastin t’i falënderoj për atë që bëjnë për gazetën në radhë të parë, por dhe për mua si drejtuese.

Si çdo punë edhe botimi i gazetës kërkon fonde dhe mjete për t’u realizuar. Si e kini zgjidhur këtë dhe a u janë afruar ndihmë në këtë drejtim?

E theksova edhe më lart, se i kishim menduar të gjitha kostot për daljen e gazetës dhe më pak ishim të shqetësuar për anën financiare, sepse ajo varet nga ne, e kemi bërë dhe do ta bëjmë dhe në të ardhmen. Por më shumë shqetësimi ishte te mbështetja morale që kërkonim, që në përgjithësi e kemi pasur nga njerëzit e thjeshtë dhe më pak nga ata që e mbajnë veten për intelektualë. Për të qenë të hapur kemi kërkuar dhe ndihmë financiare, por jo si lypje, por si mbështetje për t’i shërbyer rritjes së shërbimit të gazetës ndaj komunitetit duke e parë gazetën jo si pronë e stafit botues, por si pronë e gjithë intelektualëve, biznesmenëve, dhe komunitetit për informimin, edukimin dhe transmetimin e vlerave kulturore e atdhetare të zonës. E kemi kërkuar ndihmën duke menduar se gazeta “Domosdova” është gazetë e të gjithëve. Dhe mendoj se kemi pasur një mirëkuptim. Na është premtuar dhe kuptohet që secili në kohën e mundshme dhe në mënyrën e duhur do të kontribuojë sipas mundësisë. Diçka simbolike është bërë edhe nga reklamat, por që kuptohet që me rritjen e besueshmërisë për daljen në mënyrë të vazhdueshme të gazetës do të rriten dhe të interesuarit, për të ndihmuar si veten, ashtu dhe gazetën.

Gazeta me ç’shikojmë në numrat e deritanishëm ka material të bollshëm që ja kalon dhe gazetave më prestigjioze, mos është vallë një revistë për zonën dhe ju nuk doni ta quani të tillë?

Jo, nuk besoj se është një revistë. Në formatin A4,  është bërë për efekt të ruajtjes më të gjatë. Kurse për shumëllojshmërinë e problemeve, kjo vjen për arsye se gazeta del çdo pesëmbëdhjetë ditë dhe duhet të ketë sa më shumë informacione e dokumente për të lexuar gjatë gjithë kohës deri në daljen e numrit pasardhës. Në të ardhmen për këto qëllime, gazetës do t’i shtohen edhe suplement, për mosha e probleme të ndryshme. Po kështu stafi gazetës do të marrë përsipër dhe botimin e librave të autorëve të zonës të cilën po e fillojmë me botimin së shpejti të librit tim “Domosdova midis legjendave dhe të vërtetës”.

Unë si drejtuese e kësaj gazete të falënderoj, por nuk ke se pse të mbetesh anonim. Pyetjet e tua janë mëse të drejta dhe unë iu përgjigja për të vënë në dijeni edhe të gjithë lexuesit e kësaj gazete. Ju përshëndes.