NJË TALENTE RRAJCARE TE “LIDHJA E PRIZRENIT”

Tek shkolla “Lidhja e Prizrenit” studion nxënësja me origjinë nga Rrajca, Anxhela Stojna.

Kur shkojmë tek shtëpia e saj na bën përshtypje shkathtësia e kësaj vajze të vogël 9- vjeçare që dallonte për qetësinë dhe për botën e saj të brendshme. Ky temperament, kjo sjellje edhe ky qëndrim sikur e ndjell të ardhmen e këtij talenti. Ajo krahas shkollës punon dhe stërvitet për gjimnastikë artistike pranë klubit sportiv “Partizani” nën kujdesin e trajnerit Ferdinand Mara.

Ajo ka filluar të ecë me ritmet e valles rrajcare, saqë në bisedë e sipër babai i saj Hekuran Stojna, na tregon: -Unë çuditem me Anxhelën edhe vetë si baba, sepse ajo që në moshën 4 vjeçare e kërcente bukur vallen rrajcare, në të njëjtën kohë unë edhe Irena, bashkëshortja ime vendosëm që ta dërgojmë të ushtrohet për gjimnastikë artistike pranë klubit sportiv “Partizani”. Në qoftë se shikojmë trungun (genomën) e familjes, Anxhela, ka ngjarë si nga njerëzit e babait ashtu edhe nga njerëzit e mamasë.  Këto gene i trashëgon natyrshëm edhe Anxhela. Këtë e shohim edhe tek ditari i saj. Ja se çfarë ka shkruar:

16 Janar 2007.

 I dashur ditar!

Ditën e enjte do të kem dy testime nga drejtoria dhe dua të më ndihmosh ti ditar. Dua që të më ndihmosh vetëm ti që të marr: Shumë mirë. Dhe më fal ditari im i dashur që në testin e mësueses, mora mirë. Por po të më ndihmosh ti, do të marr shumë mirë.  Të përqafoj Anxhela!

Nga ditari tregon se Anxhela është një nxënëse sistematike dhe e shqetësuar për mësime dhe stërvitje. Duke parë zhvillimin e saj e pyesim: Cilat ushqime të pëlqejnë? Ajo me një buzëqeshje fëmijërore thotë se më pëlqejnë frutat dhe zarzavatet, veçon specin që e do ta konsumojë të freskët, ashtu siç është nga natyra.

Dhe nga biseda që zhvillohet Anxhela duket tepër e natyrshme edhe në komunikim. Ajo sapo ishte kthyer nga Rrajca ku na tregoi se kishte pjekur misra me kushërinjtë dhe kushërirat bashkëmoshatarë e bashkëmoshatare. Aj flet me ngrohtësi edhe për shoqet e saj të stërvitjes ku ajo gjen rastin edhe të na tregojë për stërvitjen dhe emrat e tyre, që janë: Xheni Kozi, Migena Hoxha, Emanuela Kalemi, Hatixhe Madoma, Resiba Koni, Risildën, Briseldën e të tjerë, me të cilat na thotë se luajnë e stërviten bashkë.

Me babain e talentes Anxhela Stojna komunikojmë dhe shohim synimet për ta mbështetur së bashku me Irenën për të arritur rezultate edhe më të mira nga ato të takimit ballkanik në Manastir në muajin shtator të vitit 2007, ku Anxhela bashkë me klubin sportiv “Partizani” zënë vendin  e parë.

Ajo synon të arrijë rezultate të mira në arenën kombëtare edhe ndërkombëtare. Dhe duke marrë parasysh moshën që ka dhe stërvitjen këmbëngulse, rezultatet e mira nuk do të mungojnë nga ana e saj.

Një mbështetje më e fortë nga ana shtetërore dhe e shoqatave të ndryshme për këta talente të rinj do të bënte që të nderoheshim dhe ta përfaqësonim sa më mirë Shqipërinë në fushën e gjimnastikës artistike.

Hallë Xhevahirja, e cila është kthyer me pushime në Shqipëri nga Miçigani i  Shteteve të Bashkuara të Amerikës na thotë se talentet atje nxiten dhe stimulohen. Ky talent është i dukshëm  dhe me vërtetë duhet stimuluar e nxitur që të kemi mundësi ta shohim të shfaqë vlerat e saj që nuk i mungojnë tek ky sport që ajo ndjek.

Fjalët e këtij reportazhi u dëgjofshin nga shteti, institucionet që merren me sporte e kulturë e shoqata të ndryshme për ta nxitur këtë talent të rrallë.

Edhe ne duke shkruar këtë shkrim na vjen në gojë natyrshëm urimi më i mirë. Të pafshim Anxhela në vendet e nderit dhe administrofsh lirinë tënde krijuese sa më mirë, duke na nderuar trevën tonë dhe Shqipërinë!

Ali COKA

Shpëtim BOZHA